In data 23 maggio 2026, il Santo Padre ha nominato l’Em.mo Card. Oswald Gracias, Arcivescovo emerito di Bombay, Suo Inviato Speciale alla XII Assemblea Plenaria della Federazione delle Conferenze dei Vescovi dell’Asia (FABC), che si terrà a Jakarta dal 20 al 26 luglio 2026.

Pubblichiamo di seguito la Lettera Pontificia all’Em.mo Inviato Speciale, Card. Oswald Gracias:

Lettera del Santo Padre

Venerabili Fratri Nostro

Osvaldo S.R.E. Cardinali Gracias

Archiepiscopo emerito Bombayensi

Dilecta de Ecclesia in Asia cogitantes, cuius progressum in christiana fide firmiter exoptamus, bona spe ducimur eam numquam in fide et in humanitate florere desinere. Quapropter, veluti in Litteris Encyclicis Nostris scripsimus, denuo fervidam Nostram invitationem et christifidelibus et fratribus in episcopatu cupimus praebere, ne metuant manus in opere temporis nostri foedare. Hac de causa oremus, sapienter cogitemus et constanter operemur, Deum in conspectu actionum nostrarum ponentes et hominem in medio electionum nostrarum. Hoc enim modo lapides reiecti - pauperes, aegroti, migrantes, parvuli - in angulares lapides vertentur; tunc domus communis firma et hospitalis nascetur, ubi caritas et veritas conveniuntur itidemque iustitia et pax in amplexu coniunguntur (cfr Ps 85,11). Ad hoc cupienda est nobis haec benedictio et a Deo imploranda, ut structores communionis fiamus et non architecti huius saeculi Babylonis; servi Regni futuri, non aedificatores turrium in ruina destinatarum. Corde ergo pastorali ac paterno omnes exhortari cupimus, ut opus exstruendae alterius Babylonis sistatur et vires uniantur ad verum bonum aedificandum, ne forte humanitas et consequenter etiam Ecclesia pulchritudinem suam amittat et mundus iterum in cordibus hominum domum ac divinum templum agnoscere possit, ubi Christus habitare desiderat (cfr Magnifica humanitas 16).

Ideo, conscii congregationes Foederatarum Conferentiarum Episcoporum Asiae, in rebus de quibus mentionem fecimus, haud parva merita habere itidemque uberem fructum afferre, libenter excepimus petitionem Venerabilis Fratris Nostri Philippi Neri Antonii Sebastiani a Rosario S.R.E. Card. Ferrão, Archiepiscopi Metropolitae Goani et Damanensis atque Praesidis supradicti Coetus Praesulum, qui, occasione eiusdem XII Plenariae Conventus, proxime a die XX ad diem XXVI Iulii Iacartae in Indonesia celebrandi, ad sollemniorem sane efficiendum hunc eventum rogavit, ut Nos Patrem Purpuratum eligeremus, qui et inter Missarum liturgiam et in congregationibus personam Nostram gereret. Te quidem, Venerabilis Frater Noster, qui peculiari cultu ac devotione erga Dominum Pastorem bonum eiusque Ecclesiam emines, harum Litterarum virtute Missum Extraordinarium Nostrum ad memoratum Foederatarum Conferentiarum Episcoporum Asiae XII Plenarium Conventum fidenter comiterque nominamus et constituimus.

Sacros Praesules, presbyteros, diaconos, cuncta vitae consecratae membra et christifideles laicos omnesque adstantes Nostro nomine salutabis, cum in hac honorifica explenda missione sacris liturgicis ritibus praesidebis, sermone tuo Nostram ad mentem illustrans praecipuorum eventuum momentum et caritatem pariter Nostram significabis erga Asiae Pastores atque dilectas eorum ecclesiales communitates.

Nos precibus tuam magni ponderis missionem sustinebimus, dum iam nunc enixe te, Venerabilis Frater Noster, committimus amantissimae tutelae Beatae Mariae Virginis eiusque Sponsi s. Ioseph. Nostram denique Benedictionem prolixe tibi imprimis elargimur, cum omnibus ad quos nunc mitteris communicandam.

Ex Aedibus Vaticanis, die XXIV mensis Iunii, in sollemnitate Nativitatis s. Ioannis Baptistae, anno Domini MMXXVI, Pontificatus Nostri secundo.

LEO PP. XIV

[01104-LA.01] [Testo originale: Latino]