In data 20 giugno 2026, il Santo Padre ha nominato l’Ecc.mo Mons. Paul Richard Gallagher, Segretario per i Rapporti con gli Stati e le Organizzazioni Internazionali, Suo Inviato Speciale alle celebrazioni del 35° anniversario del rinnovamento delle strutture della Chiesa di rito latino in Ucraina, che si terranno presso il Santuario Nazionale della Madre di Dio del Sacro Scapolare a Berdychiv, il 19 luglio 2026.
La Missione Pontificia è composta dai seguenti ecclesiastici:
1. Mons. Andrzej Legowicz, Segretario particolare dell’Arcivescovo di Lviv;
2. Don Pavlo Khomiak, Cancelliere della Diocesi di Lutsk.
Pubblichiamo di seguito la Lettera Pontificia all’Ecc.mo Inviato Speciale, Mons. Paul Richard Gallagher:
Lettera del Santo Padre
Venerabili Fratri
Paulo Richardo Gallagher
Archiepiscopo titulo Hodelmensi
Secretario
Sectionis de Rationibus cum Civitatibus et Institutis Internationalibus
Secretariae Status
«Sacrosancta Romana Ecclesia devotos ac humiles filios ex assueto pietatis officio propensius diligere consuevit et, ne pravorum hominum molestiis agitentur, eos tamquam pia Mater suae protectionis munimine confovere», scripsit Praedecessor Noster Gregorius PP. IX in Litteris ad clerum et christifideles ritus latini in territorio hodiernae Ucrainae degentes anno MCCXXXIV missis, qui «zelo fidei ac devotionis accensi, murum defensionis opposuerunt pro cultu divini nominis ampliando et occasione huiusmodi a persecutoribus fidei christianae, qui iis assiduas posuerunt insidias, saepius molestati damna sustinuerunt et rapinas», in beati Petri tutelam eos recipiens una cum «familiis eorum et aliis bonis» (Litterae dilectis filiis Ulrico et fratribus suis eorumque concivibus latinis in Kiovia).
Superioribus saeculis clerici et christifideles catholici ibi degentes testimonium fidei strenue praebuerunt variis in rerum adiunctis historiae, praecipue XX saeculo, cum Ucraina, alterius belli mundialis sub exitum, subiugata est regimini sovieticae doctrinae obnoxio. Eodemque tempore catholica Ecclesia in illa regione subiecta est crudeli persecutioni a potestate civili institutae et effectae, quae propositum habuit eam prorsus in populo exstinguendi. Transactis acerbis annis, Ecclesia Romana ibi rursus vitam et incrementum suum renovavit et nunc XXXV anniversariam memoriam celebrat instaurationis suarum institutionum. Hoc anno etiam celebrantur XXV transacti anni ab Itinere Apostolico a s. Ioanne Paulo PP. II in Ucraina peracto.
His prorsus de causis Venerabilis Frater Vitalis Skomarovskyi, Episcopus Luceoriensis Latinorum necnon Conferentiae Episcopalis Ucrainae Praeses, nomine omnium Antistitum postulavit, ut ad hoc duplex iubilaeum prosequendum Nos aliquem praestantissimum ecclesiasticum virum eligeremus, qui hac in celebratione personam Nostram gereret. Omnibus ergo mature perpensis, harum Litterarum virtute, Te, Venerabilis Frater, MISSUM EXTRAORDINARIUM NOSTRUM nominamus, tributis tibi facultatibus, ut nomine Nostro in oppido Berdychiv die XIX proximi mensis Iulii Missae celebrationi in XXXV anniversaria memoria renovationis institutionum Ecclesiae catholicae ritus latini in Ucraina atque in XXV anniversaria memoria Itineris Apostolici a s. Ioanne Paulo PP. II in Ucraina peracti praeesse valeas.
Liturgicis igitur ritibus Nostro nomine in Sanctuario Nationali Deo in honorem Beatae Mariae Virginis in oppido Berdychiv dicato praesidebis Nostramque benignam omnibus significabis salutationem itidemque paternam proximitatem. In precibus, quaesumus, Deo grato animo commendabis omnes vivos et defunctos christifideles istius populi, qui causa atrocitatis belli summopere patitur. Congregatos inde invitabis ad pacem pro mundo et familiis implorandam, necnon ad fidelitatem erga Dei mandata servandam.
Missionem tuam comitentur validum patrocinium Beatae Mariae Virginis, praesidium s. Michaëlis Archangeli et intercessio s. Petri apostoli necnon plurimorum sanctorum terrae Ucrainae. Tibi, denique, Venerabilis Frater, Nostram Apostolicam Benedictionem libenter impertimur, quam utriusque ritus catholicis Episcopis, sacerdotibus, religiosis viris et mulieribus, christifidelibus laicis, civilibus Auctoritatibus omnibusque iubilaris laetitiae participibus nomine Nostro te largiri volumus.
Ex Aedibus Vaticanis, die XXIX mensis Iunii, in sollemnitate Ss. Petri et Pauli, apostolorum, anno MMXXVI, Pontificatus Nostri secundo.
LEO PP. XIV
[01100-LA.01] [Testo originale: Latino]
