On 20 June 2026, the Holy Father appointed His Eminence Cardinal Pietro Parolin, Secretary of State, as Pontifical Legate for the celebrations scheduled to take place on 16 and 17 August 2026, on the occasion of the ninth centenary of the return of the Relics of the Martyr Saint Agatha to Catania.
The Pontifical Legate will be accompanied by a Pontifical Mission composed of the following ecclesiastics:
1. Reverend Vincenzo BRANCHINA, vicar general of the archdiocese;
2. Reverend Roberto INTERLANDI, archiepiscopal chancellor.
The following is the Letter sent by the Holy Father to the Special Envoy, His Eminence Cardinal Pietro Parolin:
Letter of the Holy Father
Venerabili Fratri Nostro
PETRO S.R.E. Card. PAROLIN
Secretario Status
Praeclarum fidelitatis erga Christum exemplar atque usque ad plenam sui ipsius oblationem amoris, in martyrio s. Agathae ecclesialis communitas gratiae de violentia fideique de timore et caritatis de morte contemplatur victoriam. In eiusdem sollemnitate proclamat liturgia Deum christifidelibus, qui fidem in Filium suum sanguine testati sunt, aeternam gloriae praeparare dignari coronam, cum agnoscat Ecclesia «Santuzza» illam – sicuti vulgo dicitur – libera et invicta voluntate, vitam suam benedictum, adscriptum, ratum, rationabile acceptabileque holocaustum incorruptibilis amoris Deo et virtute martyrii et merito castitatis (cf. Miss. Rom., 5 Febr., coll.) obtulisse. Cuius ergo sacrificium tamquam plena Paschatis Christi participatio apparet simulque praeclarum testimonium virtutis, quam Dominus illis infundit, qui in temptatione ac probatione perseverant firmi.
Proinde, peropportune Catana s. Agatham habet patronam spiritualemque matrem, praesentiam videlicet vivam, quae populi christianam custodit memoriam eumque ad evangelicam congruentiam vitae, necnon ad spem et caritatem advocat, atque eiusdem quoque reliquias devota pietate prosequitur, quae venerationem erga corpus martyris exprimit tamquam templum Spiritus Sancti ac sanctorum communionem visibilem reddit, in fidelibus conscientiam corroborans Ecclesiam in terris peregrinantem intercessione et exemplo eorum sustentari, qui iam gloriae caelestis participes effecti sunt.
Valde laetamur, igitur, de IX centesima occurrente memoria reliquiarum s. Agathae martyris providentis reditus ad metropolim Aetneam. Quam proinde recolentes insignem occasionem, Venerabilis Fratris Aloisii Renna, Catanensis Archiepiscopi Metropolitae, humanissimae petitioni libenter concedere volumus, qui enixe postulavit, ut Missarum sollemnia honori sibi ducere possint praesentiam ac verbum Tui, Venerabilis Frater Noster, quod Nostram erga conventam fidelium communitatem manifestet dilectionem.
Ad hanc ergo petitionem mentem Nostram convertentes, persuasissimum habemus Te, qui munus Secretarii Status studiose exerces ac praecipuas cum insigni ista urbe habes necessitudines, peraptum esse, ut Nostras vices ibi geras, erga dilectissimam Catanensem christifidelium communitatem proximitatem Nostram manifestans. Te, proinde, hisce Litteris Legatum Nostrum nominamus ad sollemnia diebus XVI et XVII proximi mensis Augusti agenda, in IX centesima memoria a reditu reliquiarum s. Agathae martyris in eximiam Catanensem metropolitanam urbem.
Libenter Tibi potestatem facimus, dum insigni eidem occasioni intereris, Archiepiscopum Catanensem et universum christifidelium coetum, necnon publicas auctoritates nomine Nostro salutandi ac benedicendi, quos cohorteris , ut, bonam hanc Sponsam Christi sequentes ac continua mentis suae cognitione Crucem gloriosam revolventes, exemplo eius doceantur ad verum bonum, qui solus Deus est, omnes sine mora contendere (cfr Methodius Siculus, Or. in s. Agatham).
Dum Tibi, Venerabilis Frater Noster, Benedictionem impertimur omnibus, qui celebrationi aderunt, transmittendam, legationem Tuam ardentibus precibus comitamur, a Deo misericordiae suppliciter obsecrantes, ut de hac festivitate, intercedente s. Agatha, martyre, multiplices carpant fructus.
Ex Aedibus Vaticanis, die XIII mensis Iulii, anno Domini MMXXVI, Pontificatus Nostri secundo.
LEO PP. XIV
