LETTERA DEL SANTO PADRE ALL’EM.MO CARD. LEONARDO SANDRI DI NOMINA A SUO DELEGATO PER LA CONFERMA DELLA COMUNIONE ECCLESIASTICA A SUA BEATITUDINE BÉCHARA BOUTROS RAÏ, NUOVO PATRIARCA DI ANTIOCHIA DEI MARONITI Pubblichiamo di seguito la Lettera inviata dal Santo Padre Benedetto XVI al Prefetto della Congregazione per le Chiese Orientali, Em.mo Card. Leonardo Sandri, con cui lo nomina Suo Delegato per la conferma della Comunione Ecclesiastica a Sua Beatitudine Béchara Boutros Raï, nuovo Patriarca di Antiochia dei Maroniti:
● LETTERA DEL SANTO PADRE
Venerabili Fratri Nostro
LEONARDO S.R.E. Cardinali SANDRI
Praefecto Congregationis pro Ecclesiis Orientalibus
Romani Pontifices Decessores Nostri, ut plane liquet, per saeculorum decursum, fraterna caritate et sollicito studio Orientalium Ecclesiarum Patriarchas cum beati Petri Sede plenam communionem habentes prosecuti sunt.
Cum vero laetum nuntium sit Nobis allatum Suam Beatitudinem Bechara Petrum RAÏ, nuper Patriarcham Antiochenum Maronitarum electum, antiquum morem secutum, a Nobis petere ut haec plena ecclesiastica communio cum Sede Romana confirmetur, Nos, cupientes dilectionem Nostram, existimationem et animi affectionem illi ostendere, vellemus quidem una cum eo Eucharisticam oblationem celebrare.
Te, Venerabilis Frater Noster, qui scite naviterque Congregationi pro Ecclesiis Orientalibus praees, Delegatum Nostrum nominamus, qui in Basilica Papali Sancti Petri Nostro nomine cum venerabili Patriarcha sacram Synaxim in signum constitutae ecclesiasticae communionis celebres, eum debito honore suscipiens eique Nostram fervidam salutationem referens. Dum denique Suae Beatitudini fraternum rependimus sacrum osculum, Praesulibus Maronitis, Episcopis, clericis et omnibus sacro ritui interfuturis Apostolicam Benedictionem impertimur, supernorum munerum conciliatricem ac signum Nostrae dilectionis in Christo Domino.
Ex Aedibus Vaticanis, die VIII mensis Aprilis, anno MMXI, Pontificatus Nostri sexto.
BENEDICTUS PP. XVI
[00555-07.01] [Testo originale: Latino]
[B0217-XX.01]
