LETTERA DEL SANTO PADRE ALL’INVIATO SPECIALE ALLE CELEBRAZIONI DEL 75° ANNIVERSARIO DELLE APPARIZIONI DELLA "VIERGE DES PAUVRES" (SANTUARIO DI BANNEUX, BELGIO, 31 MAGGIO 2008)

In data 29 marzo 2008, il Santo Padre ha nominato l’Em.mo Card. Godfried Danneels, Arcivescovo di Malines-Bruxelles, Suo Inviato Speciale alle celebrazioni del 75° anniversario delle apparizioni della Vierge des Pauvres, che avranno luogo nel Santuario di Banneux (Belgio) il 31 maggio 2008.

Il Cardinale Inviato Speciale sarà accompagnato da una Missione composta dai seguenti sacerdoti diocesani, membri del Capitolo Cattedrale di Liegi:

- Rev.do Can. Karl Gatzweiler;

- Rev.do Can. Joseph Bodeson.

Pubblichiamo di seguito la Lettera del Santo Padre all’Em.mo Card. Godfried Danneels:

● LETTERA DEL SANTO PADRE

Venerabili Fratri Nostro

GODEFRIDO S.R.E. Cardinali DANNEELS

Archiepiscopo Metropolitae Mechliniensi-Bruxellensi

Apparitionum Beatae Mariae "Vierge des Pauvres" in Belgii loco Banneux dum hoc anno septuagesima quinta recolitur anniversaria memoria, praeclaro hoc in Sanctuario sollemnis celebratio in honorem Matris Dei primo et tricesimo die proximi mensis Maii explebitur, qua tam clerus quam fidelis populus continuam Eius apud Filium Dei efflagitabunt intercessionem.

Nosmet Ipsi hac in Petri Cathedra divinitus instituti, maxima qua possumus devotione Virginem Sanctissimam prosequimur atque omnia pastoralia incepta in orbe fovemus quibus sacri Pastores Marialem cultum augere conantur. Laeto enim animo accepimus ad hoc insigne Dominae Nostrae, "Virginis Pauperum", Belgicum Sanctuarium complures peregrinantes singulis annis accedere. Placet Nobis pastoralem memorare in Belgium visitationem dilecti Nostri Praedecessoris Ioannis Pauli PP. II, rec. mem., qui mense Maio anno MCMLXXXV in Banneux congregatis aegrotis solamen tulit, de salvifico doloris humani pondere loquens.

Animi Nostri gaudio supplices consideravimus preces quas Nobis Venerabilis Frater Aloisius Jousten, Episcopus Leodiensis, admovit humillime rogans ut Nosmet Ipsi eminentem ecclesiasticum virum in Sanctuarium Dominae Nostrae Banneux mitteremus qui sollemni praeesset celebrationi, quae praefato die, in festivitate Visitationis Beatae Mariae Virginis, peragetur.

Libenter his precibus annuentes, ad Te quidem, Venerabilis Frater Noster, qui Sanctuarium illud omnino dilectum habes, Nostram admovemus cogitationem Nostrumque animum. Idcirco harum Litterarum vi Te designamus MISSUM EXTRAORDINARIUM, mandatis tibi factis, ut memorato die in praeclaro Belgii loco sacris celebritatibus Nostro nomine praesis atque Nostros pastorales sensus fidelibus ibi congregatis humaniter renunties. De Maria loqueris quae "praecellit inter humiles ac pauperes Domini, qui salutem cum fiducia ab Eo sperant et accipiunt" (Lumen gentium, 55), atque omnes hortaberis ad spiritalem vitam renovandam adque testimonium fidei, Maria tota sancta intercedente, rite praestandum.

Dum per Te, Venerabilis Frater Noster, omnes consalutamus Praesules et fideles qui ad sacrum illum locum peregrinantes advenient, precibus Nostris omnes comitamur atque Deum omnipotentem obsecramus ut, materno praesidio Beatae Mariae Virginis suffulti, praeceptum caritatis in vita cotidiana diligentius servare pergant.

Munus tuum magni sane ponderis aestimantes, peculiaris benevolentiae Nostrae pignus Apostolicam Benedictionem Tibi peramanter impertimus universis celebrationum participibus transmittendam.

Ex Aedibus Vaticanis, die XXVII mensis Martii, anno MMVIII, Pontificatus Nostri tertio.

BENEDICTUS PP. XVI

[00813-07.02] [Testo originale: Latino]