On 15 November 2025, His Eminence Cardinal Michael Czerny, S.J., prefect of the Dicastery for Promoting Integral Human Development, was designated Special Envoy of the Holy Father to the 34th World Day of the Sick, to be celebrated at the Shrine of Nuestra Señora de la Paz, in the diocese of Chiclayo, Peru, on 11 February 2026.
The Pontifical Mission accompanying the Special Envoy will be composed of the following ecclesiastics:
1. The Reverend Fidel PURISACA VIGIL, head of the Communication Office of the diocese of Chiclayo;
2. The Reverend Fr. Wilson Enrique GONZALES CARBAJAL, M.I., national coordinator of Health Pastoral Care – CEAS.
Letter of the Holy Father
Venerabili Fratri Nostro
MICHAËLI S.R.E. Cardinali CZERNY, S.I.
Praefecto Dicasterii pro Integra Humana Progressione fovenda
Ex quo tempore Deus Pacis Nos in Sede s. Petri convocavit atque constituit, saepe toto cordis ac mentis affectu ad illam dilectam Peruviae animo currimus terram, cuius christifideles pietate ac dilectione ducti sub tutelam Beatae Mariae Virginis fidenter confugiunt. Nosmet Ipsi enim cum duodecim ante annos in Cathedrali ecclesia, Sanctae Mariae Matri Dei dicata pro carissima Nobis Chiclayensi dioecesi episcopali sacro ordine aucti sumus, exinde suavissimae Beatae Virgini sine intermissione tam Nostram Apostolicam navitatem quam profectum in christiana fide sanctae Dei plebis et nunc potissimum totam Ecclesiam ardenter commendavimus. Divina autem e providentia evenit, quod iam bo. me. Papa Franciscus cupivit, ut XXXIV Dies Mundialis pro Aegrotantibus hac prorsus in Peruviae terra celebraretur, ad diligentius exprimendam Beatae Mariae Virginis maternam curam in omnes variis doloribus et aegritudinibus affectos. Quam mentem gratam habentes, Nosmet Ipsi, accepta Conferentiae Episcopalis Peruvianae sententia, libenter confirmamus, statuentes, ut supra dicta Mundialis Dies anni MMXXVI locum suum habeat atque sollemni modo celebretur in Sanctuario Dominae Nostrae a Pace, Chiclayensi in dioecesi, ubi olim pluries et Nos Deum precibus invocabamus.
Proinde hac data occasione, cum Nosmet Ipsi una cum Ecclesia in toto orbe terrarum pro aegrotantibus precationes peculiariter iungimus, omnibus fidelibus infirmitate, morbo vel dolore patientibus, supplicamus, ut suffulti hac materna quidem intercessione cunctas incommoditates propriae vitae pro pace hoc in mundo misericordi Deo per Mariam benigne offerre velint. Rectissime enim docet s. Augustinus, hominis animum esse inquietum et tantummodo in Dei ineffabili caritate, eiusque in cotidiana ac spiritali vita applicatione, veram ac diutinam quietem posse invenire (cfr s. Augustinus, Confessiones I,1,1).
Vigili quidem animo universae Ecclesiae Pastoris officium complere cupientes, te, Venerabilis Frater Noster, ad personam Successoris Petri gerendam atque Evangelii sapientia congregatum populum diligenter erudiendum elegimus atque, harum Litterarum virtute, Missum Extraordinarium Nostrum ad illum eventum, die XI proximi mensis Februarii, in memoria videlicet Beatae Mariae Virginis de Lourdes, sollemniter explendum renuntiamus. Sacris ritibus nomine Nostro praesidebis, animum congregatorum christifidelium, inter quos peculiariter cunctos infirmos, consolatione Evangelii ex ineffabili vicissitudine Christi, qui promisit, in omnibus rerum adiunctis, se nobiscum esse omnibus diebus usque ad consummationem saeculi (cfr Mt 28,20), corrobores atque confirmes.
Denique, Venerabilis Frater Noster, te diligenter quaesumus, ut ibi adstantes cunctos Fratres in episcopatu, civiles Auctoritates, presbyteros, diaconos atque vitae consecratae sodales necnon christifideles laicos et potissimum omnes infirmos atque illos qui eos curant comiter salutabis, Nostram benevolentiam eis ostendens, quibus omnibus suademus, ut testimonium theologalium virtutum – fidei, spei et caritatis – atque in necessitudinibus humanae et christianae proximitatis, in qua alter alterius onera portat sic legem Christi adimplens (cfr Gal 6,2), imo e pectore perhibeant.
Dum missionem tuam, Venerabilis Frater Noster, praesidio Beatae Mariae Virginis a Pace commendamus, Nostram denique Apostolicam Benedictionem, caelestium gratiarum nuntiam, tibi libenter impertimur, quam ad omnes huius Diei Mundialis pro Aegrotantibus participes pertinere volumus.
Ex Aedibus Vaticanis, die XXI mensis Ianuarii, anno MMXXVI, Pontificatus Nostri primo.
LEO PP.XIV
