Libenter ac sedula navitate quae spiritali christifidelium incremento proficiunt, ea, pro gravissimo Apostolico Nostro Munere, praestare satagimus. Qua re preces exaudiendas benigne decernimus Venerabilis Fratris Francisci Ozoria Acosta, Archiepiscopi Metropolitae Sancti Dominici, qui, audita Conferentia Episcoporum Reipublicae Dominicianae, favente quoque Venerabili Fratre Petro Georgio Bertoldi, Archiepiscopo titulari Hispellensi et in Republica Dominiciana Apostolico Nuntio, ab Apostolica Sede enixe postulavit ut, ecclesiasticae circumscriptionis sibi concreditae dismembrato territorio, nova erigeretur dioecesis.

Quapropter, de Dicasterii pro Episcopis consilio, Apostolica Nostra potestate usi statuimus et quae sequuntur decernimus: ab archidioecesi Sancti Dominici distrahimus integrum territorium municipiorum, quae populari loquela appellantur: Santo Domingo Este, San Antonio de Guerra, Boca Chica: ex ita distracto territorio novam erigimus ac constituimus dioecesim Stellae Maris (Sancti Dominici Orientalis) appellandam. Novae dioecesis sedem in urbe Santo Domingo Este statuimus, templumque ibidem Beatae Mariae Virgini, Stellae Maris, dicatum ad gradum et dignitatem evehimus Ecclesiae Cathedralis.

Novam constitutam Ecclesiam Metropolitanae Sedis Sancti Dominici suffraganeam facimus eiusque Episcopum metropolitico iuri Archiepiscopi illius dicionis pro tempore subicimus. Congruam Praesulis sustentationem novae dioecesis Curiae emolumenta, fidelium oblationes et portio procurabunt, quae ei obvenient ex divisione, ad normam canonis 122 Codicis Iuris Canonici, bonorum quae antehac ad Mensam archiepiscopalem (vulgo “Mitra”) Sancti Dominici pertinuerunt. Consilium Presbyterale, Collegium Consultorum et Consilium a rebus oeconomicis, quam primum, constituantur, qui ipsi Episcopo opem ferant. Quoad Seminarii dioecesani erectionem necnon sacrorum candidatorum formationem, praescripta iuris communis serventur, prae oculis habitis normis et regulis a Dicasterio pro Clericis statutis. Permanens sacerdotum institutio etiam curetur.

Simul atque novae dioecesis constitutio ad effectum deducta erit, eo ipso sacerdotes Ecclesiae illi censeantur adscripti in cuius territorio officium ecclesiasticum habent; ceteri vero sacerdotes, seminariique tirones illi dioecesi, in cuius territorio legitimum detinent domicilium, maneant incardinati vel incardinentur. Acta et documenta, quae in universum novam dioecesim respiciunt, a Curia Sancti Dominici ad Curiam dioecesis Stellae Maris (Sancti Dominici Orientalis) diligenter transferantur.

Ad haec tandem explenda quae per has Litteras iussimus, Venerabilem Fratrem Petrum Georgium Bertoldi legamus, quem antea memoravimus, vel, ipso a sede absente, negotiorum Sanctae Sedis gerentem, necessarias et opportunas iisdem tribuentes facultates, etiam subdelegandi quemlibet virum in ecclesiastica potestate constitutum, onere imposito ad Dicasterium pro Episcopis, cum primum fas erit, authenticum exemplar actus peractae exsecutionis remittendi.

Hanc denique Constitutionem Nostram iugiter ratam esse volumus, contrariis quibuslibet rebus non obstantibus.

Datum Romae, apud S. Petrum, die vicesimo septimo mensis Augusti, Anno Sancto bismillesimo vicesimo quinto, Pontificatus Nostri primo.

_____________________________________________

* AAS, vol. CXVII (2025), n. 10, pp. 995-996.