Sala Stampa

www.vatican.va

Sala Stampa Back Top Print Pdf
Sala Stampa


LETTERE DEL SANTO PADRE IN OCCASIONE DELLA CELEBRAZIONE GIUBILARE PER LA FESTA DELLA NATIVITÀ DELLA BEATA VERGINE MARIA, 24.08.2000


LETTERE DEL SANTO PADRE IN OCCASIONE DELLA CELEBRAZIONE GIUBILARE PER LA FESTA DELLA NATIVITÀ DELLA BEATA VERGINE MARIA

LETTERA ALL’INVIATO SPECIALE

LETTERA ALL’EGUMENO ED ESARCA ORDINARIO DEL MONASTERO DI S. MARIA DI GROTTAFERRATA

Pubblichiamo di seguito le lettere che il Santo Padre ha rispettivamente fatto pervenire al Suo Inviato Speciale, Em.mo Card. Achille Silvestrini, Prefetto della Congregazione per le Chiese Orientali, e all’Egumeno ed Esarca Ordinario del Monastero Esarchico di S. Maria di Grottaferrata, Archimandrita Emiliano Fabbricatore, in occasione della solenne celebrazione giubilare della Festa della Natività della Beata Vergine Maria, che avrà luogo nel Monastero medesimo, il 7 settembre prossimo:

LETTERA ALL’INVIATO SPECIALE

Venerabili Fratri Nostro

ACHILLI S.R.E. Cardinali SILVESTRINI

Congregationis pro Ecclesiis Orientalibus Praefecto

 

Praestanti hoc et Magno effulgente Iubilaeo, fideles etiam ad orientalem ritum pertinentes primas agunt partes in tanto eventu celebrando. Praeclaro anno hoc dies VIII mensis Septembris conspicuum obtinet locum, cum Theotokos nata recolitur, veneranda scilicet Deipara. Si quidem alibi Beatae Virginis Mariae Nativitas sollemniter commemoratur, id potissimum apud Monasterium Exarchicum B. Mariae Cryptae Ferratae agitur.

Monasterium namque hoc saeculorum decursu non modo cultu bonarum litterarum eminuit, verum etiam caelesti Matri in laudibus dicendis claruit. Animum haud semel ac mentem ad diem illum referimus cum sollemni lucernario Byzantino Nos praesedimus atque Marialem Annum inauguravimus, ut inde fere sumpto initio in totum terrarum orbem Christi Redemptoris Matris affatim fluerent beneficia ac firmum Ipsius patrocinium dirigeretur.

Suasore ergo ac petitore Reverendissimo Patre Aemiliano Fabbricatore, Egumeno et Exarcho Ordinario Sanctae Mariae Cryptae Ferratae, volentes ac libentes Missum destinare, Nativitatis B. Mariae Virginis eveniente festo in primis vesperis incohando, ad iubilarem celebrationem agendam apud Monasterium, cuius supra est facta mentio, statuimus, qui partes Nostras sustineat et personam tueatur. Ad te autem, Venerabilis Frater Noster, cogitationem convertimus, qui prorsus idoneus occurris ad ministerium hoc praestandum et luculenter explendum, cui olim fidenter Ecclesialium Orientalium destinavimus procurationem. Itaque permagna moti affectione, te, Venerabilis Frater Noster, Missum extraordinarium renuntiamus et constituimus ad celebrationem quam supra diximus agendam.

Universis igitur illius Monasterii sodalibus fidelibusque inibi cunctis voluntatem Nostram benignam ostendes et cohortationem ad Magni Iubilaei sensum plane percipiendum significes. Omnibus Nostro nomine Nostraque auctoritate Benedictionem Apostolicam impertias velimus, quae sit animorum renovationis signum et praeclari huius anni peculiarium gratiarum pignus.

Ex Aedibus Vaticanis, die X mensis Augusti, anno MM, Pontificatus Nostri altero et vicesimo.

 

IOANNES PAULUS II

 

[01728-07.02] [Testo originale: Latino]

 

LETTERA ALL’EGUMENO ED ESARCA ORDINARIO DEL MONASTERO DI S. MARIA DI GROTTAFERRATA

Reverendissimo Patri

Archimandritae Aemiliano Fabbricatore

Egumeno Exarcho Ordinario Monasterii Exarchici

Sanctae Mariae Cryptae Ferratae

 

Perpetua illa perque profunda pietas, qua erga sanctissimam Iesu Christi ferimur Matrem, haud sane Nos sinit ullam maiorem eius praeterire celebrationem publicamve commemorationem. Quin immo quo saepius cognovimus nomen ipsius honoremque per Ecclesiam excoli, eo vehementius quidem et intus laetamur et celebrantibus ipsis veluti praesentes adesse cupimus.

Singulari propterea elati sumus gaudio, cum inter alia urbis Romanae iubilaria sollemnia accepissemus simili affectu in vestro Marialis nominis coenobio mox alium Genetricis beatae titulum dignam accepturum esse venerationem videlicet Nativitatis ipsius hoc anno in pervigilio incohandam eiusdem sollemnitatis.

Hanc nimirum ob causam inter vos Venerabilem Fratrem Nostrum Achillem Silvestrini illorum rituum tempore personam vere Nostram gerere voluimus neque illud tamen satis cum haberemus, has addere placuit Litteras tamquam e manibus Nostris traditas, quibus et gratulari studemus huius praestabilis celebrationis auctoribus omnibusque participibus et Nostram consensionem testificari atque communem affectionem.

Quantum quidem possumus hortamur ut illuminatus Mariae Matris nostrae cultus in Christifidelium omnium animis roboretur, ut inde catholica vita et opera abunde nutriatur, ut denique universale Ecclesiae Magnum Iubilaeum hoc modo a coenobio Sanctae Mariae Cryptae Ferratae uberem fructum et impulsum recepisse videatur. Comitetur celebrantes Mariae Nativitatis omnes illic Benedictio Nostra Apostolica, veluti meritorum praemium ac novorum inceptorum Marialium incitamentum.

Ex Aedibus Vaticanis, die X mensis Augusti, anno MM, Pontificatus Nostri altero et vicesimo.

 

IOANNES PAULUS II

[01729-07.02] [Testo originale: Latino]