|
|
|
|
|
PAENITENTIARIA APOSTOLICA COLONIENSIS quo Indulgentiae donum conceditur tum christifidelibus qui, occasione « XX Mundialis Iuventutis Diei », Coloniam peregrinantes seu confluentes, sacris intererunt functionibus, tum ceteris christifidelibus qui, ubicumque fuerint, fervidas preces admovebunt Deo ut iuvenes christiani in professione Fidei et in vita sancte ducenda adiuventur oraverint DECRETUM Paenitentiariae Apostolicae preces nuper allatae sunt a Sacris Pastoribus, qui iuvenilia agmina spiritali ope adiuvant, ut ipsi iuvenes desideratos sanctificationis fructus attingant e suo conventu, qui hoc anno «XX Mundialis Iuventutis Dies» nuncupatur, a die 16 usque ad diem 21 currentis mensis Augusti Coloniae celebrando, ubi, circa Christi Vicarium Benedictum Pp. XVI conferti, sacris ritibus intererunt et prae primis Reconciliationis et Eucharistiae sacramentis reficientur. lpsi autem, sacramento Paenitentiae, sincero et humili corde peracto, sanctioris vitae ducendae ac pro suis totiusque mundi peccatis Deo reparationis praebendae desiderio flagrabunt, et, sacramento Eucharistiae, digne pro posse suscepto, suum Christo universorum Regi amorem testabuntur, augebunt et in opera traducent fervidioris usque caritatis, catholicique universim impensioris apostolatus. Ipsa Summi Pontificis inter iuvenes Coloniae collectos praesentia hoc exprimit et propitiat. Quibus Beatissimo Patri relatis, Apostolica Paenitentiaria speciali ad hoc facultate instructa est ut donum Indulgentiae per praesens Decretum indicat iuxta ipsius Summi Pontificis mentem, prout sequitur: Plenaria conceditur christifidelibus Indulgentia, lucranda suetis sub condicionibus (sacramentali nempe Confessione, eucharistica Communione ac oratione ad mentem Summi Pontificis), animo quidem elongato ab affectu erga quodcumque peccatum, si quot ex sacris functionibus, decursu "XX Mundialis Iuventutis Diei" Coloniae celebrandis, necnon sollemni eiusdem conclusioni attente ac religiose interfuerint. Ceteris christifidelibus, ubicumque fuerint dum praedictus conventus peragetur, partialis conceditur Indulgentia, si corde saltem contrito, ferventibus precibus a Deo petierint ut iuvenes christiani in Fidei professione roborentur, in amore et reverentia erga proprios parentes firmentur, firmumque propositum eliciant instituendae sive familiae ab ipsis noviter formandae, sive iam formatae, sive denique propriae vitae pro cuique vocatione a Deo indicata, iuxta sanctas Evangelii et Matris Ecclesiae normas. Praesenti pro hac vice valituro. Contrariis quibuscumque minime obstantibus. Datum Romae, ex aedibus Paenitentiariae Apostolicae, die 2 mensis Augusti anni 2005, in pia "Portiunculae" memoria.
Iacobus Franciscus S.R.E. Card. STAFFORD Ioannes Franciscus Girotti, O.F.M. Conv.
|
 |